Meds.ge » ჯანმრთელობა, დაავადებები, რჩევები » კისრის გაშეშება

კისრის გაშეშება

206

კისრის ტკივილი ან მისი დაჭიმულობა საკმაოდ გავრცელებული პრობლემაა, თუმცა ამ დროს არ ღირს ნერვიულობა.  

რამოდენიმე დღის შემდეგ ტკივილი და დაჭიმულობა გაივლის იმ შემთხვევაში, თუ არ გაქვთ გამოხატული რაიმე უფრო სერიოზული პრობლემა, ან თანმხლები დაზიანება.

კისრის ტკივილი და მისი დაჭიმულობა შეიძლება გამოიწვიოს  უხერხულ პოზიციაში ძილმა, კომპიუტერის კლავიატურასთან ხანგრძლივმა მუშაობამ, ან ცუდი პოზის გამო კუნთის დაჭიმულობამ.

კისრის კუნთების დაჭიმულობა ზოგჯერ შეიძლება გამოიწვიოს შფოთვითმა და სტრესულმა მდგომარეობამაც, რის დროსაც კისრის არეში აღინიშნება ტკივილი.

ჩვეულებრივ სიმპტომების გაკონტროლებას სახლის პირობებშიც შეძლებთ, ქვემოთ ჩამოთვლილი რჩევების გათვალისწინებით.

კისრის ტკივილის მკურნალობასახლის პირობებში

ზემოთ ჩამოთვლილი მიზეზებით გამოწვეული კისრის დაჭიმულობისა და ტკივილის შემთხვევათა უმეტესობაში, გაითვალისწინეთ შემდეგი რჩევა:  განაგრძეთ თქვენი ყოველდღიური აქტიური ცხოვრება და მიიღეთ ტკივილგამაყუჩებლები სიმპტომების მოსახსნელად. უფრო სპეციფიური რჩევები იხილეთ ქვემოთ.

  • ტკივილის შესამცირებლად რეგულარული დოზებით მიიღეთ  პარაცეტამოლი, იბუპროფენი, ან მათი კომბინაცია - ტაბლეტების მიღების ალტერნატივაა იბუპროფენის გელის შეზელა კისრის არეში. ყოველთვის ყურადღებით მიადევნეთ თვალყური მედიკამენტის თანმხლებ ინსტრუქციას
  • შეეცადეთ ცხელი წყლით სავსე  ბოთლის, ან  ცხელი პაკეტების საშუალებით გაითბოთ კისერი -  ამით თქვენ შეგიმცირდებათ ტკივილი და არსებული კუნთის სპაზმები
  • ღამით დაიძინეთ დაბალ, სწორ ბალიშზე - თავი მოარიდეთ ორი ბალიშის გამოყენებას, რათა თავიდან აირიდოთ კისრის არაბუნებრივი მოხრის მდგომარეობა
  • აკონტროლეთ თქვენი პოზა- საწოლში მყოფმა პოზიციამ შეიძლება გაამძაფროს ტკივილი. წაიკითხეთ, თუ როგორ დავსხდეთ სწორად
  • ნუ მოიხმართ კისრის საყელოს -  არ არსებობს იმის მტკიცებულება, რომ დარწმუნებით გირჩიოთ კისრის განსაკურნებლად საყელოს ტარება. პირიქით, უკეთესიც იქნება, თუ კისერს მისცემთ მოძრაობის საშუალებას
  • თავი მოარიდეთ ტრანსპორტის მართვას სანამ ტკივილი და დაჭიმულობა გაივლის - ამ დროს თქვენ შეიძლება ვერ შეძლოთ თავის მობრუნება და ქუჩაში ტრანსპორტის მოძრაობის სრული კონტროლი
  • თუ თქვენი კისერი მოგრეხილი ან დაჭიმულია, შეეცადეთ გააკეთოთ კისრის ვარჯიშები - ფრთხილად დაჭიმეთ კისრის კუნთები თავის ზემოთ-ქვემოთ, ან ერთიდან მეორე მხარეს მობრუნებისას. ეს ვარჯიშები გაამაგრებენ კისრის კუნთებს და შედეგად მოძრაობა გაუმჯობესდება.  

როდის უნდა მიმართოთ ექიმს  

თუ რამოდენიმე  დღის შემდეგ ტკივილი და დაჭიმულობა არ გაივლის და აღნიშნული მდგომარეობა ძალიან გაწუხებთ, ან ჩვეულებრივი ტკივილგამაყუჩებლები ვერ გიყუჩებენ ტკივილს, მიაკითხეთ ექიმს.  

ექიმი რამოდენიმე კითხვას დაგისვამთ და ამით გამორიცხავს რაიმე თანმხლებ სერიოზულ მდგომარეობას. მათ შეიძლება დაგინიშნონ უფრო ძლიერი ტკივილგამაყუჩებელიც.

თუ კისრის ტკივილი და დაჭიმულობა უკვე თვეზე მეტ ხანს გრძელდება, სთხოვეთ ექიმს, რომ  ფიზიოთერაპევტთან მოგცეთ მიმართვა.

თუ თქვენი სიმპტომები მძიმეა და არ სწორდება, ექიმი გაგგზავნით ტკივილის სპეციალისტთან ტკივილგამაყუჩებლების ინექციისთვის. წაიკითხეთ მეტი თუ როგორ უნდა იცხოვროთ ტკივილთან ერთად და აგრეთვე მიიღეთ რჩევები, როგორ უნდა მოიქცეთ მუდმივი ტკივილის დროს.  

რა იწვევს კისრის ტკივილს და გაშეშებას?

მოგრეხილი ან გაშეშებული კისერი  

ზოგიერთი ადამიანი დილით, გაღვიძების შემდეგ აღმოაჩენს, რომ მისი კისერი მოგრეხილია და გაშეშებულია ერთ პოზიციაში. ამას ეწოდება მწვავე კისერმრუდობა (torticollis) და გამოწვეულია კისრის კუნთების დაჭიმულობით.  

მწვავე კისერმრუდობის გამომწვევი ზუსტი მიზეზი უცნობია, მაგრამ ის შეიძლება განვითარდეს ცუდ პოზიციაში დიდხანს ყოფნით, არასწორ პოზაში ძილით (როდესაც კისერს არ აქვს სათანადო საყრდენი ძილისას), ან დაუბალანსებელი მძიმე წონის ზიდვით, მაგალითად მძიმე ჩანტის ტარებით მხოლოდ ერთ მხარზე, ან ერთი ხელით.

მწვავე კისერმრუდობა შეიძლება გაგრძელდეს ერთ კვირამდე, თუმცა ძირითადად ის გრძელდება 24-48 საათის განმავლობაში.

კისერში არსებული სახსრებისა და ძვლების გაცვეთა ან დაზიანება  

ზოგჯერ კისრის ტკივილი გამოწვეულია კისერში არსებული ძვლებისა და სახსრების გაცვეთით და დაზიანებით. ეს არის  ართრიტის ტიპი და  კისრის სპონდილოზი ეწოდება.

კისრის სპონდილოზი ბუნებრივად ასაკთან ერთად ვითარდება. როგორც წესი, იგი ყოველთვის არ იწვევს სიმპტომებს,  თუმცა ზოგიერთ ადამიანში ეს ძვლოვანი ცვლილებები იწვევს კისრის დაჭიმულობას. ამ დროს შეიძლება ნერვიც მოიჭყლიტოს, რაც გამოიწვევს ტკივილის მხარში  გადაცემას, ქინძისთავებისა და ნემსების ჩხვლეტის შეგრძნებას, აგრეთვე ხელებისა და ფეხების დაბუჟებას.  

მათი უმეტესი შემთხვევები გაუმჯობესდება რამდენიმე კვირის განმავლობაში.

კისრის (ტრავმული) დაზიანება

კისრის ტრავმული დაზიანება ხშირად ხდება თავის წინ, უკან ან გვერდით უეცარი მოძრაობის შედეგად.

ის ხშირად ვითარდება ავტოსაგზაო შემთხვევების დროს შეჯახებისას. თავის მკვეთრი გამოძრავება აზიანებს კისრის მყესებსა და იოგებს.

კისრის დაზიანების საერთო სიმპტომები:

  • კისრის ტკივილი და გაშეშება
  • კისრის კუნთებში მომატებული მგძნობელობა
  • კისრის შეზღუდული და მტკივნეული მოძრაობა
  • თავის ტკივილი

ნერვის მოჭყლეტა

ნერვის მოჭყლეტვით გამოწვეულ კისრის ტკივილს კისრის რადიკულოპათია ეწოდება. ეს მდგომარეობა ჩვეულებრივ ვითარდება, როდესაც ხელხემლის ზედა ნაწილის დისკო გაიხევა და იქიდან გამოიჟონება გარეთ და მიაწვება ნერვს.

ეს მდგომარეობა უფრო ხშირია ასაკოვან ხალხში, რადგან ასაკის მატებასთან ერტად, ხელხემლის დისკოები იწყებს წყლის შემცველობის დაკარგვას, ამიტომ ისინი ნაკლებად მოქნილი ხდებიან და უხერხული მოძრაობისას შეიძლება გაიხეს.

ტკივილი ზიგჯერ შეიძლება შემსუბუქდეს ტკივილგამაყუჩებლებით და ქვემოთ მოცემული რჩევების გათვალისწინებით, თუმცა ზოგიერთი ადამიანისთვის შეიძლება რეკომენდირებული იყოს ქირურგიულილ ოპერაცია.

უფრო სერიოზული გამომწვევი მიზეზები

კისრის ტკივილი შეიძება იყოს უფრო სერიოზული მიზეზით გამოწვეული და თანდათანობით უარესდებოდეს, ან შეიძლება თან ახლდეს დამატებითი სიმპტომებიც, როგორებიცაა:

  • კოორდინაციის უნარის დაკარგვა/შესუსტება
  • სიარულის პრობლემები
  • შარდის ბუშტის ან ნაწლავების კონტროლის უნარის დაკარგვა
  • მაღალი ტემპერატურა (სიცხე)
  • გაურკვეველი მიზეზით წონის დაკარგვა. 

სერიოზული მიზეზი უფრო ალბათურია, თუ ახლო წარსულში პაციენტს ჰქონდა მნიშვნელოვანი დაზიანება, მაგალითად მოხვდა ავტოავარიაში, ან დაეცა, ან ჰქონდა სიმსივნე, ან ისეთი მდგომარეობა, რომელიც ასუსტებს იმუნურ სისტემას, მაგალითად ადამიანის იმუნოდეფიციტის ვირუსი.

კისრის ტკივილის პრევენცია

კისრის ტკივილის პრევენციისთვის შეიძლება დაგეხმაროთ ქვემოთ ჩამოთვლილი რჩევები:

  • დარწმუნდით, რომ ჯდომისას ან დგომისას ინარჩუნებთ სწორ პოზას. წაიკითხეთ მეტი სწორი პოზიციების შესახებ (ინგლისურ ენაზე) (how to sit correctly, how to use a laptop safely და common posture mistakes and fixes)
  • როდესაც კისერი ერთი და იგივე პოზიციაში გაქვთ დიდი ხნის განმავლობაში, მაგალითად სამსახურში, ან მანქანის მართვისას, გააკეთეთ რეგულარული შესვენებები.
  • თუ ხშირად ხართ სტრესულ ვითარებაში, სცადეთ სტრესის მოხსნის და დამშვიდების საშუალებები
  • ეცადეთ არ დაიძინოთ მუცელზე და ძილის დროს დარწმუნდით, რომ თავი და ტანი არის ერთ სიბრტყეზე და არ არის გადახრილი, თუ იძინებთ გვერდზე
  • მხოლოდ და მხოლოდ გამოიყენეთ იმდენი და ისეთი ზომის ბალიში, რომ თავი და ტანი იყოს ერთ დონეზე
  • ეცადეთ დაიძინოთ შედარებით მაგარ მატრასზე, რადგან რბილ მატრასზე ძილის დროს თავი და კისერი იქნება მოხრილი ტანთან მიმართებაში.

კომენტარის დამატება