ივერიუმი - ჰუმანითი / iveriumi - humaniti / Iverium - Humanity

შემადგენლობა
5 მლ სიროფი შეიცავს:
აქტიურ ნივთიეირებას – დესლორატადინს 2,5 მგ-ს,
დამხმარე ნივთიერებებს: პროპილენგლიკოლს, გლიცერინს, ლიმონმჟავას მონოჰიდრატს, ნატრიუმის ციტრატს, ნატრიუმის ბენზოატს, დინატრიუმის ედეტატს, საქაროზას, ყვითელი დაისის საღებავს, ხილის ნარევის არომატიზატორს, გასუფთავებულ წყალს. 

აღწერილობა
გამჭვირვალე მოყვითალო-ნარინჯისფერი სიროფის მაგვარი სითხე ხილის არომატით. 

ფარმაკოლოგიური ჯგუფი
სისტემური მოქმედების ანტიჰისტამინური პრეპარატები. დესლორატადინი.

ათქ კოდი R06AX27

ფარმაკოლოგიური თვისებები 
ფარმაკოკინეტიკა
დესლორატადინის ბიოშეღწევადობა დოზის პროპორციულია დოზების დიაპაზონში 5-დან 20 მგ-მდე. 
პრეპარატის შიგნით მიღების შემდეგ დესლორატადინი კარგად აბსორბირდება კუჭ-ნაწლავის ტრაქტიდან და განისაზღვრება სისხლის პლაზმაში მიღებიდან 30 წუთის შემდეგ. სისხლის პლაზმაში დესლორატადინის მაქსიმალური კონცენტრაცია მიიღწევა საშულოდ 3 საათის შემდეგ, ნახევრად გამოყოფის პერიოდი (T1/2) შეადგენს საშუალოდ 27 საათს. კუმულაციის ხარისხი კორერილებს გამოყენების ჯერადობასთან (1 ჯერ დღეში) და ნახევრად გამოყოფის პერიოდთან. კლინიკურად მნიშვნელოვანი კუმულაცია ერთჯერადად დღეში დოზით 5-20 მგ მიღებისას 1 კვირის განმავლობაში, გამოვლენილი არ არის. 
დესორატიდინის ბიოშეღწევადობა შეყვანილი დოზის პროპორციულია (5-20 მგ-ის დიაპაზონში). დესლორატადინი ზომიერად (83-87%) უკავშირდება სისხლის პლაზმის ცილებს. 
საკვების ან გრეიფრუტის წვენის ერთდროული მიღება არ მოქმედებს დესლორატადინის განაწილებაზე დღეში ერთჯერადი მიღებისას. დესლორატადინი არ წარმოადგენს CYP3A4 და CYP2D6 ინჰიბიტორს და არ წარმოადგენს  P-გლიკოპროტეინის სუბსტრატს ან ინჰიბიტორს. დესლორატადინი ბიოტრანსფორმირდება ორგანიზმში ჰიდროქსილირების გზით და შემდეგ გამოიყოფა ორგანიზმიდან  შარდთან და განავალთან ერთად. 

ფარმაკოდინამიკა
დესლორატადინი წარმოადგენს ლორატადინის პირველად აქტიურ მეტაბოლიტს.
პერორალური მიღების შემდეგ დესლორატადინი სელექტიურად ბლოკავს პერიფერიულ H1-ჰისტამინურ რეცეპტორებს. პრეპარატი არ გადის ჰემატო-ენცეფალურ ბარიერში, არ ახდენს სედატიურ მოქმედებას.         
მრავალრიცხოვანი კვლევების მონაცემების მიხედვით დესლორატადინი, ანტიჰისტამინური აქტივობის გარდა, ახდენს ანთების საწინააღმდეგო მოქმედებას.
დადგენილია, რომ დესლორატადინი თრგუნავს სხვადასხვა რეაქციებს, რომლებიც საფუძვლად უდევს ალერგიული სიმპტომების განვითარებას, კერძოდ:
• ანთების საწინააღმდეგო ციტოკინების გამოყოფა (ინტერლეიკინები: ილ-4, ილ-8, ილ-6, ილ-13)
• ანთების საწინააღმდეგო ჰემოკინების გამოყოფა
• ჰემოტაქსისი და ეოზინოფილური გრანულოციტების ადჰეზია
• P-სელექტინის ექსპრესია და სხვა მოლეკულების ადჰეზია
• D2 პროსტაგლანდინების, ჰისტამინის და   C4 ლეიკოტრიენის lgE-დამოკიდებული გამოყოფა
• სუპეროქსიდული ანიონის წარმოქმნა პოლიმორფულ-ბირთვული ნეიტროფილური გრანულოციტებით (აქტივირებულით)
• ეოზინოფილების ადჰეზია და ჰემოტაქსისი
• მწვავე ალერგიული ბრონქოსპაზმი. 

გამოყენების ჩვენებები 
- სეზონური და ქრონიკული ალერგიული რინიტის სიმპტომების მკურნალობა (ცემინება, გამონადენი ცხვირიდან, ქავილი, ცხვირის შეშუპება და გაჭედვა, ასევე თვალების ქავილი, ცრემლდენა და თვალების შეწითლება, ხველა)
- ქრონიკული იდიოპათიური ჭინჭრის ციების მკურნალობა (კანის ქავილი, გამონაყარი).

გამოყენების წესი და დოზირება
დესლორატადინის მიღება შეიძლება საჭმლის მიღების დამოუკიდებლად.

დოზირება:
2-დან 5 წლამდე ასაკის ბავშვები: შიგნით მისაღები სიროფის 2,5 მლ (1,25 მგ დესლორატადინი), დღეში ერთხელ.
6-დან 11 წლამდე ასაკის ბავშვები: შიგნით მისაღები სიროფის  5 მლ (2,5 მ დესლორატადინი), დღეში ერთხელ.
მოზრდილები და მოზარდები (12 წლის ასაკის ზევით): შიგნით მისაღები სიროფის  10 მლ (5მგ დესლორატადინი), დღეში ერთხელ.
მიღების ხანგრძლივობა განისაზღვრება დაავადების სიმძიმის და მისი მიმდინარეობის მიხედვით. სეზონური ალერგიული რინიტის მკურნალობის დროს პრეპარატი ინიშნება სიმპტომების გაჩენის შემთხვევაში და გამოიყენება მათ მოხსნამდე. 
ქრონიკული რინიტის დროს შესაძლებელია ხანგრძლივი მკურნალობა (ალერგენთან პაციენტის კონტაქტის მთელი პერიოდის განმავლობაში).  

გვერდითი მოვლენები
ყველაზე ხშირი გვერდითი მოვლენები:
- დაღლილობა (1,2%)
- პირის სიმშრალე (0,8%)
- თავის ტკივილი (0,6%)
ძალიან იშვიათი (˂1/10000):
- თავბრუსხვევა, ძილიანობა, უძილობა, ფსიქომოტორული აგზნება, პაროქსიზმი
- ტაქიკარდია
- ტკივილი მუცლის არეში, გულისრევა, ღებინება, დისპეფსია, დიარეა
- ღვიძლის ფერმენტების, ბილირუბინის აქტივობის ზრდა, ჰეპატიტი
- მიალგია
- ჰიპერმგრძნობელობის რეაქციები (ანაფილაქსია, კვინკეს შეშუპება, ქოშინი, ქავილი, გამონაყარი, ჭინჭრის ციება). 

უკუჩვენებები
- მომატებული მგრძნობელობა პრეპარატის აქტიური ნივთიერების ან რომელიმე დამხმარე კომპონენტის მიმართ
- 2 წლამდე საბავშვო ასაკი
- ორსულობა და ლაქტაციია.

სამკურნალწამლო ურთიერთქმედებები
კეტოკონაზოლთან, ერითრომიცინთან, აზითრომიცინთან, ფლუოქსეტინთან, ციმეტიდინთან პრეპარატის ერთდროული გამოყენებისას კლინიკურად მნიშვნელოვანი ურთიერთქმედება არ არის გამოვლენილი. 
ვინაიდან დესლორატადინის მეტაბოლიზმზე პასუხისმგებელი ფერმენტი არ არის ცნობილი,  სხვა სამკურნალო საშუალებებთან ურთიერთქმედების სრული გამორიცხვა ვერ ხერხდება.  
ალკოჰოლის მიღება არ ახდენს პრეპარატის მოქმედების ცვლილებას. 

განსაკუთრებული მითითებები
დესლორატადინი არ იწვევს ფსიქომოტორული ფუნქციის დარღვევას და ძილიანობას. 
14 დღის განავლობაში დღიური დოზით 20 მგ პრეპარატის გამოყენებისას კლინიკურად მნიშვნელოვანი ცვლილებები გულ-სისხლძარღვთა სისტემის ფუნქციონირებაში გამოვლენილი არ ყოფილა. 
თირკმლის მძიმე უკმარისობის მქონე პაციენტებში  პრეპარატი ინიშნება სიფრთხილით.
გამოყენება პედიატრიაში
დესლორატადინის ეფექტურობა და უსაფრთხოება დადგენილი არ არის 1 წლამდე ასაკის ბავშვებში. 
2 წლამდე ასაკის ბავშვებში ძნელია ალერგიული რინიტის დიფერენციული დიაგნოსტირების ჩატარება. Dდიაგნოზის დადგენისას საჭიროა  ზედა სასუნთქი გზების ინფექციების,  სტრუქტურული დარღვევების არარსებობის,  პაციენტის ანამნეზის, სამედიცინო გამოკვლევების, ლაბორატორიული მაჩვენებლების და კანის ალერგიული ტესტების გათვალისწინება.
გალაქტოზას მემკვიდრეობითი აუტანლობა, ლაპას ლაქტაზას დეფიციტი ან გლუკოზა/გალაქტოზას მალაბსორბცია.
პრეპარატი შეიცავს საქაროზას. ფრუქტოზას მეკვიდრეობითი აუტანლობის, გლუკოზა-გალაქტოზას მალაბსორბციის სინდრომის ან საქაროზა-იზომალტური უკმარისობის მქონე პაციენტებში პრეპარატი არ ინიშნება. 
ორსულობა და ლაქტაციის პერიოდი.
დესლორატადინის გამოყენების უსაფრთხოება ორსულებში დადგენილი არ არის, ამიტომ არ არის რეკომენდირებული მისი მიღება ორსულობის პერიოდში. 
დესლორატადინი აღწევს დედის რძეში, შესაბამისად არ გამოიყენება ლაქტაციის დროს.
 
ტრანსპორტის მართვაზე და პოტენციურად საშიში მექანიზმების მართვის უნარზე ზემოქმედება. 
დესლორატადინის ზეგავლენა ავტომობილის მართვაზე ან რთულ ტექნიკურ მოწყობილობებთან მუშაობაზე აღნიშნული არ ყოფილა. მაგრამ უნდა იქნას გათვალისწიენბული, რომ იშვიათ შემთხვევებში პრეპარატის მიღების შემდეგ აღინიშნება ძილიანობა, რამაც შეიძლება  გავლენა იქონიოს რეაქციის სიჩქარეზე. 

ჭარბი დოზირება
სიმპტომები: თავის ტკივილი, პირის სიმშრალე, დაღლილობა.
მკურნალობა: ჭარბი დოზირების შემთხვევაში ნაჩვენებია კუჭის ამორეცხვა და აქტივირებული ნახშირის გამოყენება. რეკომენდირებულია სიმპტომატური მკურნალობა.  
პრეპარატი არ გამოიყოფა ჰემოდიალიზის დროს; მისი გამოყოფის შესაძლებლობა პერიტონეალური დიალიზის დროს დადგენილი არ არის. 

გამოშვების ფორმა და შეფუთვა
100 მლ ყვითელი ფერის ფლაკონებში.
თითო ფლაკონი სამედიცინო გამოყენების ინსტრუქციასთან ერთად მოთავსებულია მუყაოს კოლოფში. 

შენახვის პირობები 
ინახება არაუმეტეს 25°C ტემპერატურაზე, მშრალ, ბავშვებისთვის მიუწვდომელ ადგილას. 

ვარგისიანობის ვადა
2 წელი.

გაცემის წესი:
ფარმაცევტული პროდუქტის ჯგუფი III, გაიცემა რეცეპტის გარეშე